आम्हा दोघांचं हे वागणं, हल्ली असंच चालत राही
मन म्हणतं एकदा बोल तिच्याशी, मी त्याचं ऐकत नाही
मी म्हणतो मनाला, की एकदा बोलून तुझं भागत नाही
मन म्हणतं आज एवढं ऐक, बाकी मी काही मागत नाही
अरे तुझं काय जातंय, एकदा बोल असं सांगायला
एक अनामिक हुरहूर मग, मनात लागते रांगायला
तुझ्या एकदा बोल च्या नादात, मी काळवेळ पहात नाही
आणि बोलायला सुरुवात केली, की मी माझा रहात नाही
काहीतरी करून मग मी, आज मनाला शांत करतो
उद्या पुन्हा हेच होणार, निदान आजचा दिवस तर सरतो
मनवण्या माझ्या मनाला, मी कितीदा भाव द्यावा?
पुन्हा आठवावे तिला एकदा अन् , मनाने मनाचा पुन्हा ठाव घ्यावा
